2015 Rhif 88 (Cy. 7)

AFON, CYMRU

PYSGODFEYDD EOGIAID A DŴR CROYW

Gorchymyn Gwahardd Cadw neu Ollwng Pysgod Byw (Rhywogaethau Penodedig) (Cymru) 2015

NODYN ESBONIADOL

(Nid yw’r nodyn hwn yn rhan o’r Gorchymyn)

Mae erthygl 3(1) yn gwahardd cadw neu ollwng yng Nghymru, heb drwydded a ddyroddwyd o dan Ddeddf Mewnforio Pysgod Byw (Cymru a Lloegr) 1980 (“y Ddeddf”), unrhyw rywogaethau o bysgod dŵr croyw anfrodorol byw, neu wyau byw pysgod o’r fath, sy’n perthyn i’r urddau tacsonomaidd a restrir yn y tabl yn Rhan 1 o’r Atodlen.

Nid yw’r Gorchymyn hwn yn gymwys pan fo gan berson drwydded i gyflwyno’r pysgod hynny o dan Reoliad y Cyngor (EC) Rhif 708/2007 ynghylch defnyddio rhywogaethau estron a rhai sy’n absennol yn lleol mewn dyframaethu neu pan fo hysbysiad wedi ei gyflwyno sy’n caniatáu i berson symud y pysgod hynny o dan Reoliadau Rhywogaethau Estron a Rhywogaethau sy’n Absennol yn Lleol mewn Dyframaethu (Cymru a Lloegr) 2011 (O.S. 2011/2292 (erthygl 1(4)). Yn ogystal, nid yw’r Gorchymyn hwn yn gymwys i gadw neu ollwng pysgod byw mewn dyfroedd mewndirol (erthygl 1(5)). Nid yw’r gwaharddiad yn erthygl 3(1) yn gymwys mewn perthynas â physgod a restrir yn y tabl yn Rhan 2 o’r Atodlen (erthygl 3(2)).

Mae’n drosedd o dan adran 3 o’r Ddeddf i unrhyw berson gadw neu ollwng unrhyw un neu ragor o’r rhywogaethau o bysgod a restrir yn Rhan 1 o’r Atodlen i’r Gorchymyn hwn heb drwydded ddilys. Mae adran 3 hefyd yn ei gwneud yn drosedd i fynd yn groes i delerau trwydded. Mae person sy’n cyflawni’r troseddau yn adran 3 yn atebol, ar gollfarn ddiannod, i ddirwy nad yw’n fwy na lefel 4 ar y raddfa safonol.

Mae erthygl 4 o’r Gorchymyn hwn yn dirymu Gorchymyn Gwahardd Cadw neu Ollwng Pysgod Byw (Rhywogaethau Penodedig) 1998 (O.S. 1998/2409) (“Gorchymyn 1998”) o ran Cymru. Mae hefyd yn dirymu Gorchymyn Gwahardd Cadw neu Ollwng Pysgod Byw (Rhywogaethau Penodedig) (Diwygio) (Cymru) 2003 (O.S. 2003/416 (Cy. 60)) a rheoliad 29 o Reoliadau Rhywogaethau Estron a Rhywogaethau sy’n Absennol yn Lleol mewn Dyframaethu (Cymru a Lloegr) 2011 (O.S. 2011/2292) (“Rheoliadau 2011”), yr oeddent ill ddau yn diwygio Gorchymyn 1998. Dirymwyd Gorchymyn 1998, Gorchymyn Gwahardd Cadw neu Ollwng Pysgod Byw (Rhywogaethau Penodedig) (Diwygio) (Lloegr) 2003 (O.S. 2003/25) a rheoliad 29 o Reoliadau 2011 o ran Lloegr gan Orchymyn Gwahardd Cadw neu Ollwng Pysgod Byw (Rhywogaethau Penodedig) (Lloegr) 2014 (O.S. 2014/143).

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Gorchymyn hwn. O ganlyniad, paratowyd Asesiad Effaith Rheoleiddiol o’r costau a’r manteision sy’n debygol o ddeillio o gydymffurfio â’r Gorchymyn hwn. Gellir cael copi oddi wrth: Llywodraeth Cymru, Parc Cathays, Caerdydd CF10 3NQ.

2015 Rhif 88 (Cy. 7)

AFON, CYMRU

PYSGODFEYDD EOGIAID A DŴR CROYW

Gorchymyn Gwahardd Cadw neu Ollwng Pysgod Byw (Rhywogaethau Penodedig) (Cymru) 2015

Gwnaed                                28 Ionawr 2015

Gosodwyd gerbron Cynulliad

 Cenedlaethol Cymru            2 Chwefror 2015           

Yn dod i rym                     27 Chwefror  2015

Mae Gweinidogion Cymru wedi eu dynodi at ddibenion adran 2(2) o Ddeddf y Cymunedau Ewropeaidd 1972([1]) o ran mesurau sy’n ymwneud â pholisi amaethyddol cyffredin yr Undeb Ewropeaidd([2]).

Mae Gweinidogion Cymru, yn unol ag adran 1(2) o Ddeddf Mewnforio Pysgod Byw (Cymru a Lloegr) 1980([3]) (“y Ddeddf”) (“the Act”) wedi ymgynghori â Chorff Adnoddau Naturiol Cymru a Natural England ac unrhyw bersonau eraill y mae Gweinidogion Cymru yn ystyried eu bod yn briodol, ac maent o’r farn y gallai’r rhywogaethau o bysgod byw, neu wyau byw pysgod, y mae’r Gorchymyn hwn yn gymwys iddynt gystadlu yn erbyn, dadleoli, ysglyfaethu neu niweidio cynefin unrhyw bysgod dŵr croyw, pysgod cregyn neu eogiaid yng Nghymru a Lloegr.

Mae Gweinidogion Cymru yn gwneud y Gorchymyn a ganlyn drwy arfer y pwerau a roddwyd iddynt gan adran 1(1) o’r Ddeddf, ac sy’n arferadwy bellach ganddynt hwy([4]), ac adran 2(2) o Ddeddf y Cymunedau Ewropeaidd 1972.

Enwi, cychwyn a chymhwyso

1.—(1) Enw’r Gorchymyn hwn yw Gorchymyn Gwahardd Cadw neu Ollwng Pysgod Byw (Rhywogaethau Penodedig) (Cymru) 2015 a daw i rym ar 27 Chwefror2015.

(2) Yn ddarostyngedig i baragraff (3), mae’r Gorchymyn hwn yn gymwys o ran Cymru.

(3) Mae erthygl 4(c) yn gymwys o ran Cymru ac mae i “Cymru” (“Wales”), at ddibenion y paragraff hwn yn unig, yr un ystyr ag a roddir i “Wales” yn rhinwedd adran 158(1) o Ddeddf Llywodraeth Cymru 2006([5]).

(4) Nid yw’r Gorchymyn hwn yn gymwys o ran cyflwyno unrhyw bysgod byw gan berson – 

(a)     y dyroddwyd trwydded iddo o dan Reoliad y Cyngor (EC) Rhif 708/2007([6]) o ran defnyddio rhywogaethau estron a rhywogaethau sy’n absennol yn lleol mewn dyframaethu, neu

(b)     y cyflwynwyd hysbysiad iddo o dan reoliad 7(2)(b) neu (3)(b) (hysbysiadau sy’n caniatáu symud) o Reoliadau Rhywogaethau Estron a Rhywogaethau sy’n Absennol yn Lleol mewn Dyframaethu (Cymru a Lloegr) 2011([7]).

(5) Nid yw’r Gorchymyn hwn yn gymwys i gadw neu ollwng pysgod byw mewn dyfroedd mewndirol.

Dehongli

2. Yn y Gorchymyn hwn —

mae i “dyfroedd mewndirol” (“inland waters”) yr un ystyr ag yn adran 221 o Ddeddf Adnoddau Dŵr 1991([8]) ond nad ydynt yn cynnwys pyllau gerddi sy’n llai na 0.4 hectar o faint, nad ydynt yn cael eu defnyddio ar gyfer pysgota, nad oes ganddynt gysylltiadau â dyfroedd eraill ac sydd wedi eu lleoli o fewn cwrtil eiddo preswyl; ac

ystyr “pysgod dŵr croyw” (“freshwater fish”) yw unrhyw bysgod sy’n byw, neu’n gallu byw, mewn dŵr croyw.

Gwahardd cadw neu ollwng pysgod neu wyau penodedig

3.—(1) Ni chaiff neb, ac eithrio o dan awdurdod trwydded a roddwyd gan Weinidogion Cymru, gadw neu ollwng unrhyw bysgod dŵr croyw byw, neu wyau byw unrhyw bysgod dŵr croyw–

(a)     sy’n perthyn i urdd dacsonomaidd a restrir yng ngholofn gyntaf y tabl yn Rhan 1 o’r Atodlen; a

(b)      nad ydynt yn frodorol i Gymru a Lloegr.

(2) Nid yw’r gofyniad am drwydded ym mharagraff (1) yn gymwys o ran unrhyw rywogaethau o bysgod anfrodorol a bennir yn nhrydedd golofn y tabl yn Rhan 2 o’r Atodlen ac sy’n perthyn i urdd dacsonomaidd y cyfeirir ati ym mharagraff (1).

Dirymiadau

4. Dirymir y canlynol—

(a)     Gorchymyn Gwahardd Cadw neu Ollwng Pysgod Byw (Rhywogaethau Penodedig) (Diwygio) (Cymru) 1998([9]);

(b)     Gorchymyn Gwahardd Cadw neu Ollwng Pysgod Byw (Rhywogaethau Penodedig) (Diwygio) (Cymru) 2003([10]); ac

(c)     rheoliad 29 o Reoliadau Rhywogaethau Estron a Rhywogaethau sy’n Absennol yn Lleol mewn Dyframaethu (Cymru a Lloegr) 2011([11]).

 

 

 

 

 

Carl Sargeant

Y Gweinidog Cyfoeth Naturiol, un o Weinidogion Cymru

 

28 Ionawr 2015

 

                   YR ATODLEN        Erthygl 3

Rhestr o Bysgod

RHAN 1

Urddau tacsonomaidd y mae unrhyw rywogaethau o bysgod dŵr croyw nad ydynt yn frodorol i Gymru a Lloegr yn perthyn na chaniateir eu cadw na’u gollwng heb drwydded

 

Urdd dacsonomaidd	Enw cyffredin
Acipenseriformes	Styrsiwn, Pysgod Sbodol
Amiiformes	Morgwn
Anguilliformes	Llysywod
Atheriniformes	Pysgod Ystlys Arian
Batrachoidiformes	Môr-lyffaint
Beloniformes	Môr-nodwydd, Pysgodyn hedegog
Ceratodontiformes	Pysgod ysgyfeiniog
Characiformes	Tetrâu, Characiniaid, Pensafwyr
Clupeiformes	Penwaig, Brwyniaid, Gwangod
Cypriniformes	Carp, Gwrachod, Pilcod
Cyprinodontiformes	Pysgod abwyd
Esociformes	Penhwyaid
Gasterosteiformes	Crethyll
Gonorynchiformes	Kneriidae
Gymnotiformes	Llafnbysg
Lepidosyreniformes	Pysgod ysgyfeiniog De Americanaidd ac Affricanaidd
Lepisosteiformes	Môr-nodwyddau neu Gornbigau
Myliobatiformes	Morgathod duon
Osmeriformes	Brwyniaid Conwy
Osteoglossiformes	Arapaimaod
Perciformes	Draenogiaid, Glöynnod y môr, Ciclidau, Tiwnaod
Percopsiformes	Draenogiaid brithion, Pysgod ogof
Petromyzontiformes	Llysywod pendoll
Pleuronectiformes	Lledod mwd a Lledod chwithig
Polypteriformes	Cyrsbysg
Salmoniformes	Eogiaid, Brithyllod, Powaniaid
Scorpaeniformes	Pysgod dreiniog, Sgorpioniaid
Siluriformes	Morfleiddiaid
Synbranchiformes	Llysywod pigog
Syngnathiformes	Pibellau môr, Morfeirch
Tetraodontiformes	Chwyddbysgod

 

RHAN 2

Rhywogaethau o bysgod nad ydynt yn frodorol i Gymru a Lloegr y caniateir eu cadw neu eu gollwng heb drwydded

 

Urdd dacsonomaidd	Enw cyffredin	Enw’r rhywogaeth
Cypriniformes	Carp a phob amrywiaeth ohono	Cyprinus carpio
	Pysgod aur a phob amrywiaeth ohonynt	Carassius auratus
	Orffod	Leuciscus idus
Salmoniformes	Brithyllod seithliw, ac eithrio’r Brithyllod Arian Esgynnol	Oncorhynchus mykiss ac eithrio’r Brithyllod Arian Esgynnol